നമ്മുടെ നമസ്കാരത്തിന് എത്രയുണ്ട് മാർക്ക്?

നമ്മുടെ നമസ്കാരത്തിന്റെ ചൈതന്യവും ഭയ ഭക്തിയും സ്വയം അളന്നുനോക്കി നമുക്ക്  തന്നെ മാർക്കിട്ട് നോക്കാം. ആകെ മാർക്ക് : 10x10 = 100. ഒരു ചോദ്യത്തിന് പൂർണ്ണമായും "അതെ" എന്നാണ് ഉത്തരമെങ്കിൽ 10 മാർക്ക്.  അപൂർണ്ണമാണെങ്കിൽ പത്തിൽ താഴെയുള്ള മാർക്കുകൾ നൽകുക. ഉത്തരം "ഇല്ല" എന്നാണെങ്കിൽ ഒരു മാർക്കുമില്ല.

1 ) നമസ്കാരത്തിന്റെ തുടക്കത്തിൽ തന്നെ, ഞാനിപ്പോൾ നിൽക്കുന്നത് അല്ലാഹുവിന്റെ മുന്നിലാണെന്നും, ചിലപ്പോൾ ഇത് എന്റെ അവസാനത്തെ നമസ്കാരമായിരിക്കുമെന്നും, അല്ലാഹുവിനെയല്ലാതെ ഓർക്കുന്നത് ഇനി എനിക്ക് നിഷിദ്ധമാണെന്നും ചിന്തിച്ച് കൊണ്ടാണോ തക്ബീറതുൽ ഇഹ്റാം (നിഷിദ്ധമാക്കുന്ന തക്ബീർ ) ചൊല്ലിയത് ?

2 ) നമസ്കാരത്തിന്റെ പ്രാരംഭ പ്രാർത്ഥനയായ വജ്ജഹ്ത്തു ചൊല്ലിയപ്പോൾ അതിലെ പ്രഖ്യാപനങ്ങളും, പ്രതിജ്ഞകളും  മനസ്സിലേക്ക് കൊണ്ടുവരാൻ ശ്രമിച്ചോ ?

3 )ഫാത്തിഹ സൂറത്ത് ഓതിയപ്പോൾ അതിലെ ഓരോ വാക്യത്തിന്റെയും അർത്ഥവും ആശയവും ഗ്രഹിക്കുവാൻ ശ്രദ്ധിച്ചുവോ ?

4) ഫാതിഹാക്ക് ശേഷമുള്ള സൂറത്തു ഓതിയപ്പോൾ അതിലെ ഓരോ ആയത്തിന്റെയും ആശയം മനസ്സിലേക്ക് കൊണ്ടുവന്നുവോ?

5 ) റുകൂഇലെ ദിക്റുകൾ മനസ്സാനിധ്യത്തോടെയാണോ ചൊല്ലിയത് ? 

6) ഇഅ്തിദാലിലെ സ്തുതി കീർത്തനങ്ങൾ മനസ്സറിഞ്ഞ് കൊണ്ടാണോ ഉരുവിട്ടത് ?

7) സുജൂദുകളിലെ ദിക്റുകൾ അർത്ഥം ആലോചിച്ച് കൊണ്ടാണോ ചൊല്ലിയത്  ?

8) ഞാനിപ്പോൾ അല്ലാഹുവിനോട് ഏറ്റവും അടുത്തെത്തിയിരിക്കുന്നു എന്ന് വിചാരിച്ച് ഭയഭക്തിയോടെയാണോ സുജൂദുകൾ നിർവഹിച്ചത്  ?

9) രണ്ട് സുജൂദുകൾക്കിടയിലുള്ള ഇരുത്തത്തിലെ ദുആ അർത്ഥം മനസ്സിലാക്കിയാണോ ചോദിച്ചത് ?

10 ) അത്തഹിയാത്തിലെ ദിക്റ് സ്വലാതുകളുടെയും പ്രാർത്ഥനകളുടെയും പ്രാധാന്യം അറിഞ്ഞ് കൊണ്ടാണോ ചൊല്ലിയത് ?

   നൂറിൽ നൂറ്  നേടാനായില്ലെങ്കിലും 40 മാർക്കെങ്കിലും നേടാൻ നമുക്കാവണം. 

അല്ലാഹു അനുഗ്രഹിക്കട്ടെ. 

അല്ലാഹുവിന്റെ റസൂൽ (സ) പറഞ്ഞു: 
" إن الرجل لينصرف وما كتب له إلا عشر صلاته تسعها ثمنها سبعها سدسها خمسها ربعها ثلثها نصفها " رواه أحمد
( ഒരാൾ നമസ്കാരം നിർവഹിക്കും. പക്ഷെ, ആകെ നമസ്ക്കാരത്തിന്റെ പത്തിലൊന്ന്, ഒമ്പതിലൊന്ന്, എട്ടിലൊന്ന്, ഏഴിലൊന്ന്, ആറിലൊന്ന്, അഞ്ചിലൊന്ന്, നാലിലൊന്ന്, മൂന്നിലൊന്ന്,പകുതി ഇപ്രകാരം മാത്രമാണ് അയാൾക്ക് രേഖപ്പെടുത്തുക )  

ഇബ്നുൽ ഖയ്യിം (റ) പറഞ്ഞു:
 صلاةٌ بلا خشوعٍ، ولا حضور، كبدنٍ ميِّتٍ لا روح فيه، 

( ഭയഭക്തിയും മനസ്സാന്നിധ്യവുമില്ലാത്ത നമസ്കാരം ആത്മാവില്ലാത്ത, ചത്ത ശരീരം പോലെയാണ്.)

ഇബ്നു അബ്ബാസ് (റ) പറഞ്ഞു:
ليس للعبد من صلاته إلا ما عقل منها
(ഒരു അടിമക്ക് അവന്റെ നമസ്കാരത്തിൽ അവൻ മനസ്സറിഞ്ഞ് നിർവ്വഹിച്ചതല്ലാതെ മറ്റൊന്നുമില്ല).